1Th 4 | GAM | STEP | Agana ambana kambono, God wopake kando singare yene mal ge no ye ombine dje aupin, ye karkar yei. Alla ipon Iwa Kerman Jisas kandjiye al no ye embe ye tuluk tane dje kandja dongall dje aunmon.

1 Thessalonians 4

Nono gaklene ulle djingjang ke ge nayembon

1 Agana ambana kambono, God wopake kando singare yene mal ge no ye ombine dje aupin, ye karkar yei. Alla ipon Iwa Kerman Jisas kandjiye al no ye embe ye tuluk tane dje kandja dongall dje aunmon. 2 Iwa Kerman Jisas kandjiye al no ye singare yene mal dje aupin ye pille kane yenj.

3 God nomane ge embe mal paro, ye wopake ta mal molo iwana djingdjang ke aulaul yenj ge nayene. 4 Ye singare wopake ta mal ye, una singare wopake kaninj mal ye, 5 yenekne gaklene ulle paro ge kantau wopake yene. Iwana orko molo God pille kane nayenj, yenekne gaklene ulle bombon golo yenj mal ye embe nayene. 6 Ye embe nayei dal, para ye agane ye ke ye naune, gamane ngundjo naine. No ye asamoll dje awo kerpin, una singare embe yei dal, Iwa Kerman ye ke ye aunda, ye kanpol tane. 7 God nono yau toi ge, djingdjang nomane panda dje yau natoi, singare wopake ta mal yembon dje yau toi. 8 Ge pille, una no kandja dje ye aunmon ge to wori dal, una kandjine to naworinj, ge God yene Murble ye aundo una kandjiye ge to worinj.

9 Ye God unakye agane ambane ta kane wopake yene mal kandja ge no pepa eri bolo aumbon naparo. Ye yenekne kane wopake yene mal God ye beke awi pora dji. 10 Ge kaima, ye pillgi pai agane ambane kambono propins Masedonia mor ge ye kane wopake yenj. Ba no ye kandja dje aumon, ye embe ye tuluk tane. 11 Ye kogo yembon dje yene ge, ye kiye dje molo, yenekne aglene al kogone paro mal ye moye. No ye kandja ge dje aupin pora dji. 12 Ye embe yene al ge, orko una ye kane pagle kiye dje moye. Ye una ta seng ye agle kui nayene.

Iwa Kerman er yem wonda kandja

13 Agana ambana kambono, una gor ge ye pille kune yene dje djinmon. Una tarowamo ye, God una i pla naworda dje pille mor mal ge, ye embe nayene dje djinmon. 14 Jisas golo aglo er wo gun pi dje pillgi djinmon. Embe pille, une wonda poke, Jisas pillgi dji una goi ge, God dje indaka Jisas boll aike wone dje kanmon. 15 Iwa Kerman yene kandja dji mal pille no kandja ye dje awo embe djinmon. Iwa Kerman wonda poke, nono gun molo parmon una er wekle bonka asa molo goi una ge are nawone, man. 16 Iwa Kerman kandja kerman djindaka, biugel boyaka, tau agelo wekle moro una yau tondaka, Iwa Kerman yene kupill al er kal wondaka, una Jisas pillgi dji una goi ge asamoll agiye. 17 Are nono una gun molo parmon ge ne, una asa goi ge i kam kupa al worneke aike molo Iwa Kerman boll ege ege molo pa mopon. 18 Embe pille, ye kandja ge djineke, yenekne pakna mor al, kumbene arngan yendaka aglo gi dje moye.